ഹരികൃഷ്ണന്‍സ്‌ എന്ന പടത്തോടു കൂടിയാണല്ലോ ഇരട്ട ക്ലൈമാക്സ്‌ എന്ന ആശയം അറിയപ്പെട്ടു തുടങ്ങിയത്‌. എന്നാല്‍ അതിനും വര്‍ഷങ്ങള്‍ക്കു മുന്‍പു തന്നെ ഈ ആശയം മലയാള സിനിമയില്‍ പ്രാവര്‍ത്തികമാക്കിയിരുന്നു. 1953 മാര്‍ച്ച്‌ 21ന്‌ പുറത്തിറങ്ങിയ തിരമാല എന്ന ചിത്രത്തിലൂടെ. രണ്ടു ക്ലൈമാക്സായിരുന്നു ഈ പടത്തിനുണ്ടായിരുന്നത്‌. ഒന്നില്‍ നായകന്‍ കടല്‍ത്തിരയില്‍ പെട്ടു മരിക്കുന്ന ദുരന്തപര്യവസായിയും മറ്റൊന്നില്‍ അദ്ദേഹം കാമുകിയെ വിവാഹം ചെയ്യുന്ന ശുഭപര്യവസായിയും. തിരുവിതാംകൂര്‍ ഭാഗങ്ങളില്‍ ആണു ആദ്യത്തെ ക്ലൈമാക്സുള്ള പടം റിലീസ്‌ ചെയ്തതു. കൊച്ചി, മലബാര്‍ ഭാഗങ്ങളില്‍ രണ്ടാമത്തെ ക്ലൈമാക്സും. ഈ പടത്തിന്റെ വിതരണക്കാരുടെ ആവശ്യപ്രകാരം ആണ്‌ ഇങ്ങനെ ഇരട്ട ക്ലൈമാക്സ്‌ ഉണ്ടാക്കിയത്‌. ചെങ്ങന്നൂരിനടുത്ത്‌ പമ്പാ നദിയില്‍ വച്ചാണ്‌ നായകന്‍ മുങ്ങി മരിക്കുന്ന ഇതിന്റെ ക്ലൈമാക്സ്‌ രംഗം ചിത്രീകരിച്ചത്‌. നദിയില്‍ മുട്ടൊപ്പം വെള്ളം മാത്രമെ ഉണ്ടായിരുന്നുള്ളു അപ്പോള്‍. എന്നാലും അന്നത്തെ സാങ്കേതിക വിദ്യ ഉപയോഗപ്പെടുത്തി ആ രംഗം നായകന്‍ കടലില്‍ മുങ്ങി മരിക്കുന്ന പോലെ വളരെ ഭംഗിയായി രൂപാന്തരപ്പെടുത്തി. ഫോര്‍ട്ടുകൊച്ചിക്കാരനായ തോമസ്‌ ബര്‍ളി എന്ന ബഹുമുഖ പ്രതിഭ ആണ്‌ ഈ ചിത്രത്തിലെ നായകന്‍.
മറ്റു ചില പ്രത്യേകതകള്‍ കൂടി ഈ ചിത്രത്തിന്‌ അവകാശപ്പെടനുണ്ട്‌. പി ഭാസ്കരനും, അടൂര്‍ ഭാസിയും ആദ്യമായി അഭിനയിക്കുന്നത്‌ ഈ പടത്തില്‍ ആണ്‌. അതു പോലെ ശാന്ത പി നായര്‍ ആദ്യമായി സിനിമയില്‍ പാടുന്നതും ഈ ചിത്രത്തിലൂടെയാണ്‌
